Totalt er det no 7000 gjestearbeidarar som jobbar i rotasjon på det største verftet i landet, Aker Solutions på Stord. Talet på fastbuande sysselsette i kommunen er rundt 10.000.

Berre i skatteinntekter får den norske staten igjen nesten ein milliard kroner frå desse arbeidarane i året, ifølgje ei grov utrekning kommunedirektør Tommy Johansen har gjort.

Reknestykket hans viser at kommunen ville fått nesten 300 millionar i direkte skatteoverføring dersom arbeidarane hadde budd fast på Stord.

Aker Solutions på Stord seier dei har fleire tiltak og ordningar for å dempa presset på beredskapen i kommunen.

– Me har styrka bedriftshelsetenesta, oppdimensjonert industrivernet og har auka vakt- og servicepersonell rundt verft og brakkeleirar, ifølgje kommunikasjonssjef Odd Naustdal.